Der bint nog maor weinig mèensen die Drèents praot en nog veul minder die Drèents leest. Mèensen die Drèens schrieven kunt, bint der haost niet niet mèer. Drentse dichters en schrievers kuj zowat op twee handen tellen. Een stuk of dartig. Hooguut. Dat kuj sneu vinden, maor ’t is wat ’t is. Veur de cultuurindustrie, de boekhandel, uutgeverijen, theaters, podia of kraanten is dat barre oninteressant: der valt gien dreuge stoetkörst an te verdienen. Seins komp Den Haag of Assen met wat geld over de brugge veur dit of dat project, maor een stralende literaire toekomst zit der niet in. Het is wachten op een wonder. Of: Godot op de Hondsrug.
Boer & Köster hebt dacht: wij zwumt tegen de stroom in! Veural umdat der daolderse teksten schreven wordt! Wij maakt mooie boekies veur weinig geld. Wij doet ’t zunder boekhandel en aander gedoe. Wij gaot op tjak, de diek op want leesders bint der. Lichtkaans niet al te veul, maor wal met veul liefde veur boeken en teksten. Wij organiseert met wat schrievers lezings in de leegstaonde kerkies, achter op ’t heuiveld, an ’t diepie en overal waor ze oes hebben wilt. Wij wilt der gien geld met verdienen, maor gewoon een mooie tied hebben!
De eerste uutgave van Boer & Köster is de Bloemlezing.17 dichters en schrievers hebt een bijdrage levert: een gedicht of een kört verhaal.
Bloemlezing
66 bladziedes
€ 10,-
Te koop bij oeze lezings of te bestellen per mail:
luciemartin@online.nl
Tegelieks met de Bloemlezing komt de eerste uutgave van een Daolders Gedicht. Een keuze uut de beste gedichten uut Drenthe en umstreken. Dat kan een nei gedicht wezen of een klassieker.
Dagen under de Grote Den
Gerrit Boer
1 gedicht veur € 1,50
Te koop bij oeze lezings of te bestellen per mail:
luciemartin@online.nl
Lezing
De eerste lezing van Boer & Köster is op 18 mei in het Zweeler Kerkie.
In Zweel wordt de Bloemlezing veurstelt deur 7 schrievers en dichters: Suze Sannders, Egbert Hovenkamp II, Ton Peters, Tonko Ufkes, Gijsje Gramsma, Gerrit Boer, Anne Doornbos.
De muziek komp van pianist en componist Charles Lagendijk uut Eemster.
Intree is € 10, inclusief een exemplaar van de Bloemlezing. Koffie en thee is gratis.
Zweeler Kerk
De Wheem 10,
7851 TA Zweeloo
Zundag, 18 mei,
15.00 – 17.30 uur
De Zeuvendaagse (2007, alwèer 18 jaor leden) is een haost historische gebeurtenis in de Drèentse cultuurgeschiedenis! De gedichten lagen niet mèer op de schrieftaofel van de dichter, ze lagen niet mèer te vergammeln op een plaankie in de boekenwinkel. Nee, ze waren te heuren op ‘t heideveld, an ‘t diepie, op de straote tussen Spier en Wiester, in de kerke. En zölfs op RTV Drenthe waren dichters te zien, gedichten te heuren!
Joep van Ruiten schreef op zien blog ‘Woest en Ledig’:
“Zeuvendaagse bevat bijdragen van onder anderen Bart FM Droog, Erik Harteveld, Suze Sanders, Jan Glas, Tjitse Hofman, Kasper Peters, Rense Sinkgraven en Egbert Hovenkamp. Vorig jaar liepen zij onder leiding van Jan Veenstra en Ton Peters zeven dagen door Drenthe, op zoek naar de literaire wortels van de provincie.Onderweg gingen ze met H.H. ter Balkt langs bij zijn oude school in Zandpol, bezochten ze het huis van Vasalis, bewonderden ze met Rutger Kopland de Drentse Aa bewonderen en brachten ze met Suzanna Jansen een bezoek aan Veenhuizen. Ook Westerbork (Etty Hillesum, Jaap Meijer), het Koekangerveld (Max Dendermonde) en Smilde (Jacob Israël de Haan, Carry van Bruggen) werden bezocht.De schrijvers en dichters legden alles vast in notities, dagboekfragmenten, gedichten, verhalen en foto’s. een prachtig overzicht van literair Drenthe.”
Veul van de schrievers die in 2007 op tjak waren, kuj ok wèer in oeze Bloemlezing vinden: Jan Veenstra, Marga Kool, Ton Peters, Egbert Hovenkamp II, Suze Sanders, Kasper Peters. Het boek is in 2008 verschenen bij uutgeverij De Passage. Met wat geluk kuj lichtkaans nog hier of daor nog een exemplaar kopen. ‘t Is de meuite wèerd.
De eerste Drèentse gedichtenbundel:
’t Diggelhoes van Louis Albert Roessingh uut 1948
Louis Albert Roessingh weur in 1873 geboren in Assen, 1951 kwam e in Antwarpen oet de tied, begraven weur Roessingh in Börk. Nao de HBS in Assen studeerde Roessingh in Antwarpen an de Academie der Schoone Kunsten. Hij woonde met zien familie in België, maor hef wal altied een starke baand met Drenthe had. Met wat umwegen over Haolen kwam Roessingh begun 1900 in Elp terecht. Hij wol een plek hebben um in ok Drenthe warken te kunnen.
Roessingh begun pas laat te schrieven. Eerst veur de aordigheid, vanof 1923 schreef e vaak veur de Nieuwe Drentsche Volksalmanak.
Veul van dizze gedichten weurden 1948 veur de bloemlezing ‘t Diggelhoes deur Jan Naarding uutgeven. Het was de eerste bundel, die in ‘t Drèents uutgeven weur. Roessingh hef met zien gedichten en zien hang naor romantiek grote invloed had op Drèentse dichters.